اشعار ترکی شعرای آذربایجان

اؤیله مستم بیلمرم کی می ندیر مینا ندیر

گول ندیر بولبول ندیر سونبول ندیر صحرا ندیر

اود توتوب جانیم سراسر یاندی اما بیلمدیم

دل ندیر دلبر ندیر باشیمدا بو سئودا ندیر

بیلمدیم عؤمرومده هرگز کفرو ایمان هانسیدیر

احمد و محمود کیمدیر عیسی و موسی ندیر

شاهباز اوج وحدت واحد و حی قدیم

خالق ارض و سما اول فرد بی همتا ندیر

ترّهاتی قوی کناره رقصه گل دیوانه وار

گل خرابات ایچره گؤر بو شوزش و غوغا ندیر

دور گؤزون قوربانیام مستانه گل ریندانه وئر

چوخ دئمه جمشیددن اسکندر و دارا ندیر

شاهد خلوت نشینیم ائتدی روخسارین عیان

عاشق دیوانه گل گؤر ظاهر و اخفا ندیر

یئتدی عؤمرون آخیرا سن بیر((نباتی)) بیلمدین

کیمدی بو گؤزدن باخان یا دیلده بو گویا ندیر

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

مصطبه عشقده باده و مینایه باخ/ساقی گولرنگی گور ساغروصهبایه باخ

حلقه ریندانه گل دیر موغان سئیرین ائت/اهل خرابات آرا مومن و ترسایه باخ

ذوق مئی عشقدن جوشا گلیب شیر تک/هی هی مستانی گور شورش و غوغایه باخ

شعشعه ی باده دن شمس اولوب منفعل/لمعه جام بلور هاله اولوب آیه باخ

نغمه چنگ و رباب شاهد شمع و شراب/همهمه سازی گور زمزمه نایا باخ

بولبول طبعیم یئنه اؤزگه نوا باشلاییب/ دئر کی گول اولموش خزان بو خبر وایا باخ

غم یئمه شاد اول کونول اولما بو سوزدن ملول/صبر ائله سن بیر زمان قدرت مولایا باخ

امرینه موشگول دگیل کم ائده پیر و جوان/ ائیله گوزوم اعتقاد بیرجه زولیخایا باخ

چکدی سوزون رشته سین بیر بت لیلی خرام/ سالدی منی چوللره آه بو صحرایا باخ

آی سنی تانری یئنه ائتمه پریشان منی/ بیرده منه سؤیلمه زولف چلیپایا باخ

هیچ و عبث کونلومو ائتدی بو سوزلر تباه/ آخیر اولوب حاصلیم غم یوکو سئودایا باخ

اینجیمه دور چال قلم من سنه قوربان اولوم/قویما سوزو ناتمام طعنه اعدایا باخ

یوخسا یورولدون مگر ایلقا حله هارداسان/مسجد اقصی دی بو عرش معلایا باخ

قورخما دگیل اژدها بالله عصادیر عصا/موسی عمران کیمی سن ید بیضا یا باخ

برق صفت قیل گوذر جمله حجاباتدان/ فوق ثریا یا چیخ منظر اعلایا باخ

شاه عرب لافتی وئرسه مورادیم اگر/ نظم دررباری گور گوهر انشایا باخ

کلبه احزانیمیز اولدو منور یئنه/ آچ گوزون ای بینوا یار مه آسایا باخ

زولف شکن در شکن طره پرپیچ و خم/ناوک مژگانی بیر گوزله او شاخ یایا باخ

چوخدا سوزو آشکار ائتمه دانیش پرده ده/سنده حیا یوخ مگر عاشق رسوایا باخ

نقطه خالین یئنه سالدی منی حیرته/ منده داخی نطق یوخ کلک شکر خایا باخ

طائر فیکریم یئنه همپر سیمرغ اولو.ب/ سئیر قیلار قافده بچه عنقایا باخ

داغلارا سال هوی های سسله ده مجنون هارای/عاشق دیوانه گل هودج لیلایا باخ

جانی نثار ائتمه دین یارا"نباتی" فقیر/ ایندی بو غمخانه ده ها شب یلدایا باخ.

حکیم سید ابوالقاسم نباتی:

<<حکیم سید ابوالقاسم نباتی>>(1192-1262ه.ق)در روستای خرم وسرسبز "اوشتوبون"در ولایت قراداغ از آذربایجان به دنیا آمده ودر همان جا دفع شده است.وی در علوم دینی وعرفانی تحصیلات عمیقی داشته وبه سه زبان تورکی وعربی وفارسی آثاری از خود بر جای گذاشته است.تحصیلات حوزوی ومراتب سیر وسلوک خودرادرتبریز به فرجام رسانیده ودر اردبیل به سلک مریدان"ناصر علیشاه اردبیلی"درآمده و درخانقاه سرخاب تبریز به"مجنونشاه قراداغی"معروف شده است.

دیوانهای تورکی و فارسی/رساله"عین العشق" وپاره ای از اشعار عربی وی دو قرن است که درمیان دوستداران عرفان اسلامی واغلب دراویش وعرفا دست به دست می گردد.اشعارش بسیار شورانگیز و عاری از هرگونه تعقیدات لفظی وسرشار از صنایع زیبای ادبی است.

دیوان تورکی حکیم نباتی به قلم "دکتر ح.م.صدیق/ نشر اختر"از شانزده بخش تشکیل شده که عبارتند از:

قصیده لر.غزللر.قوشمالار.گرایلیلار.بئشلیکلر.تجنیسلر.مستزادلارو...!

نوشته شده توسط رضا آیقین در یکشنبه دهم آبان 1388 ساعت 17:25 موضوع حکیم سید ابوالقاسم نباتی | لینک ثابت

ترسا بالاسی

اذن وئر توی گئجه سی من ده سنه دایه گلیم

ال قاتاندا سنه مشاطه تماشایه گلیم

سن بو مهتاب گئجه سی سیره چیخان بیر سرو اول

اذن وئر من ده دالونجا سورونوب سایه گلیم

منه ده باخدین او شهلا گوزوله من قارا گون

جراتیم اولمادی بیر کلمه تمنایه گلیم

من جهنمده ده باش یاسدیقا قویسام سنیله

هئچ آییلمام کی دوروب جنت ماوایه گلیم

ننه قارنیندا دا سنله اکیز اولسایدیم اگر

ایسته مزدیم دوغولوب بیر ده بو دونیایه گلیم

سن یاتیب جنتی رویاده گورنده گئجه لر

منده جنتده قوش اوللام کی او رویایه گلیم

قیتلیغ ایللر یاغیشی تک قورویوب گوز یاشیمیز

کوی عشقونده گرک بیرده مصلایه گلیم

سنده صحرایه مارال لار کیمی بیر چیخ نولی کی-

منده بیر صیده چیخانلار کیمی صحرایه گلیم

آللاهوندان سن اگر قوخمیوب اولسان ترسا

قورخورام منده دؤنوب دین مسیحایه گلیم

شیخ صنعان کیمی دونقوز اوتاریب ایللرجه

سنی بیر گورمک ایچون معبد ترسایه گلیم

یوخ صنم! آنلامادیم، آنلامادیم حاشا من

بوراخیم مسجدیمی سنله کلیسایه گلیم!

گل چیخاق طور تجلایه سن اول جلوه طور

منده موسی کیمی اول طوره تجلایه گلیم

شیردیر((شهریار))ین شعری الینده شمشیر

کیم دیئر من بئله بیر شیریله دعوایه گلیم؟!

آذر 1353

نوشته شده توسط رضا آیقین در دوشنبه پنجم اسفند 1387 ساعت 1:22 موضوع استاد محمد حسین شهریار | لینک ثابت

گولسه هر کیمسه بیزیم دیده گریانیمیزا

دوشسون عالمده گوروم حال پریشانیمیزا

عشق چوخ دلبر بی مهره اسیر ائتدی بیزی

بیری رحم ائیلمه دی ناله   و     افغانیمیزا

دوست ساندیق گوروب هر شوخو بلاسین چکدیک

دوشمن اولدو یئنه آخیرده بیزیم جانیمیزا

ذوق آلار عشقیده بیزدن گوروب احوالیمیزی

هانسی درد اهلی اگر گلسه بیزیم یانیمیزا

زولف زنجیرینه عقل ایله اسیر اولمامیشیق

عشق دیوانه سی ییک باخما بو نقصانیمیزا

گلدی گول فصلی بیزی ساقی نظردن سالدی

پیر  میخانه   گرکدیر    باخا      دیوانیمیزا

دم غنیمتدی مئی ایچ /بدرینی*/ ((واحد)) باشا سال...(*:شاعر سید زاده بدری).

بیر علاج اولسا   اودور    درد    فراوانیمیزا

---------------------------------------------------------------------------------------------

ائیله دی آواره منی

سالدی هیجران اودونا اول بت مه پاره منی

ائیله دی زولفوتک هیجرینده گونو قاره منی

درد طغیانیمه   بیجا یئره    زحمت چکمه

تاری شاهددی طبیب اؤلدورو بو یاره منی

قیلدی کونلوم قوشونو حلقه زولفونده اسیر

وار خیالی چکه منصور کیمی داره منی

سرکویوندا وطن قیلمیش ایدیم دیلدارین

اوزدو وصلیندن الیم ائیله دی آواره منی

من تک عالمده غم و درده گرفتار اولسون

کیم کی حسرت قویوب اول مهوش دلداره منی

سن بو حسنیله زلیخای جهانسان ای مه

نولا عشقین چکه یوسف کیمی بازاره منی

واحدا زولف نیگاریم    اینجه لدی تنیم

کیم گؤرو بنزه دیر اول زولفده بیر تاره منی

نوشته شده توسط رضا آیقین در دوشنبه پنجم اسفند 1387 ساعت 1:21 موضوع علی آقا واحد | لینک ثابت

غزلیات و قصاید ترکی حکیم نظامی گنجوی

برگرفته از نسخه خطی کتابخانه خدیویه مصر

صدیار وظیفه (ائل اوغلو).

مژده ای خاطر پژمرده کی دلبر گله جک

جان ساراییندا امیر اولماغا سرور گله جک

یئنه ده دل بولبولی باشلادی فغان ائیله مگه

مگر اول سرو گول اندام سوسنبر گله جک

نفس باد صبا غالیه سا اولدو مگر

او ساچی نافه تر زولفی معنبر گله جک

گئده جک محنت و اندوه و غم و درد و عنا

یئرینه راحت و شادی و صفالر گله جک

شب فرقت گئده جک محنت و هجران گئده جک

صبح وصل ایریشر و مهر منور گله جک

نئجه بیر سعی ائدیبن وصلینه ایریشمک اوچون

دم فطرتده نه کیم اولدو مقدر گله جک

سن نگار ایله "نظامی" منی عالمده دخی

صنما سانما کی بیر بی دل و دلبر گله جک

نوشته شده توسط رضا آیقین در دوشنبه بیست و پنجم آذر 1387 ساعت 18:17 موضوع حکیم نظامی گنجوی | لینک ثابت

تبریز

 شبلی دن گوروندو گول تک جمالین

گلدیم بولبول کیمی فغانه تبریز

اولدو قسمت یئنه سنین وصالین

بو قلبی چیرپینان جوانه تبریز

.............................................

سنه قوربان اولوم سئودیگیم وطن

هر یئرین باغچادیر هر یئرین چمن

چمنلرده آچیب گوزل یاسمن

عطریندن گلیرم ایمانه تبریز

..........................................

دئیلیر آدینا داروالسلطنه

شاهلار شاهزاده لر باش اگیب سنه

داغلارین داشلارین دؤنسون گولشنه

باهارین دؤنمه سین خزانه تبریز

..........................................

سن منه آناسان ائل منه آتا

آنا ائولادینی روادیر آتا؟!

باغلارام قمه نی مینه رم آتا

وئرمه رم تئلینی جهانه تبریز

........................................

کئچمه سین چراغین یانسین اوجاغین

جنت گوشه سی دیر هر بیر بوجاغین

آنامدان عزیز دیر منه قوجاغین

گلمز محبتیم بیانه تبریز

.................................................

نا امید گورمه ییر گوزوم هیچ کسی

گلیر سحر- سحر قوشلارین سسی

گؤی مچید بناسی ارکین قالاسی

قالیب کئچمیشیندن نشانه تبریز

.............................................

هانی بس قهرمان ستارخان هانی؟

چاغیر امدادینا او مرد انسانی

بلکه اصلاح ائده آذربایجانی

بیر تکان وئره بو زمانه تبریز

...........................................

شاعرم اؤره گیم دولودور دولو

آچیقدیر اؤزومه حقیقت یولو

تؤکؤلسه باشیما گؤیلردن دولو

دیزلریم بوکولمز دوشمانه تبریز

نوشته شده توسط رضا آیقین در سه شنبه بیست و یکم آبان 1387 ساعت 11:17 موضوع شاعر محمد بی ریا | لینک ثابت